「流口水」英文點講好？

喺香港讀咗咁多年英文，有冇發覺自己嘅英文喺生活層面其實所知相當有限？今次就為大家講吓「流口水」嘅英文係乜。

立春已過，可以正式同大家講聲馬年快樂，祝大家馬到功成，馬……是啦但！年假雖然已完，但係諗返起新年期間享用過嘅美食，大家係咪仲有流口水嘅感覺呢？查實喺新年期間我就帶咗幾個初嚟香港嘅外國人四圍走、四圍食。帶佢哋走到深水埗嘅時候，佢哋聞到街上嘅香味，不約而同講咗句: Hey, what's that smell? My mouth's watering!

  

冇錯，原來用英文表達「我流口水喇」嘅講法就係 My mouth is watering. 再講多少少，有隻英文字 "drool" 都係解口水，當名詞用，但都可以當動詞用解「流口水」。其實 "drool" 呢隻字都有頗多用法，例如你想講「佢對個女仔流晒口水啦！」，可以用 "He's drooling over her." 嚟表達。 

查吓字典嘅話，會發現口水嘅術語係 "saliva"，即係「唾液」，比較少用喺口語英文。去返口語層面，原來 "mouth-watering" 又係另一個字，當形容詞用，解做「令人流晒口水」。遇到好味嘅嘢，我例牌都會講句：Wow, it's mouth-watering!

今次講住咁多先，下次再見！